அமெரிக்காவின் பாதுகாப்பு அரண் சரிந்தது..!!

அமெரிக்கா மறைக்க நினைத்த மத்திய கிழக்கின் உண்மையான போர்க்கள நிலைமையை செயற்கைக்கோள் தொழில்நுட்பம் உலகிற்கு வெளிச்சம் போட்டுக் காட்டியுள்ளது….

மத்திய கிழக்கு நாடுகளில் நடைபெறும் போர் நடவடிக்கைகளில் தங்களுக்கு ஏற்பட்ட பாதிப்புகள் மிகக் குறைவு என்று வாஷிங்டன் தொடர்ந்து கூறி வந்தாலும், உண்மையில் அங்கு நடந்த அழிவுகள் அதைவிட மிகவும் பெரியது என்பதை BBC Verify நிறுவனத்தின் சிறப்பு ஆய்வு வெளிப்படுத்தியுள்ளது. பிப்ரவரி மாத இறுதியில் இருந்து இதுவரை 8 மத்திய கிழக்கு நாடுகளில் உள்ள 20க்கும் மேற்பட்ட அமெரிக்க ராணுவ மற்றும் கூட்டு பாதுகாப்பு தளங்கள் மீது ஈரானின் தாக்குதல்களால் நேரடி பாதிப்பு ஏற்பட்டுள்ளதாக சர்வதேச செயற்கைக்கோள் தரவுகள் மற்றும் வீடியோக்களை வைத்து அவர்கள் சுட்டிக்காட்டுகின்றனர். சில பாதுகாப்பு நிபுணர்களின் கணிப்புப்படி, தாக்குதலுக்கு உள்ளான தளங்களின் எண்ணிக்கை 28 வரை இருக்கக்கூடும்.

சவுதி அரேபியா, ஐக்கிய அரபு அமீரகம், கத்தார், குவைத், ஈராக், ஜோர்டான், பஹ்ரைன் மற்றும் ஓமன் ஆகிய நாடுகளில் உள்ள தளங்களே இந்த தாக்குதலுக்கு இலக்காகியுள்ளன. இந்த நிலையில், முன்னணி செயற்கைக்கோள் புகைப்பட நிறுவனமான ‘Planet’ அமைப்பிடம், மத்திய கிழக்கின் புதிய செயற்கைக்கோள் காட்சிகளை வெளியிடுவதற்கு காலவரையற்ற தடை விதிக்குமாறு அமெரிக்கா கோரிக்கை வைத்துள்ளது. இருந்தாலும், BBC ஆய்வாளர்கள் மற்ற சர்வதேச செயற்கைக்கோள் சேவைகளின் உதவியுடன் இந்த ரகசிய அழிவுகளுக்கான ஆதாரங்களை கண்டுபிடித்துள்ளனர்.

இந்த தாக்குதல்களில் அமெரிக்காவின் பாதுகாப்பு கட்டமைப்புக்கு ஏற்பட்ட மிகப்பெரிய நிதி மற்றும் உத்தி ரீதியான இழப்பு என்னவென்றால், உலகின் மிக நவீனமான மற்றும் விலை உயர்ந்த பாதுகாப்பு அமைப்பான THAAD (Terminal High Altitude Area Defense) பேட்டரி சிஸ்டம்கள் மூன்று இலக்காக்கப்பட்டது தான். ஐக்கிய அரபு அமீரகத்தின் அல் ருவைஸ், அல் சாதர் மற்றும் ஜோர்டானின் முவாஃபக் சல்டி ஆகிய விமானப்படை தளங்களில் இருந்த இந்த சிஸ்டம்களுக்கு பலத்த சேதம் ஏற்பட்டுள்ளது. உலகம் முழுவதும் அமெரிக்காவிடம் இப்படிப்பட்ட 8 THAAD சிஸ்டம்கள் மட்டுமே உள்ளன. இதில் ஒன்றை உருவாக்குவதற்கு மட்டும் 1 பில்லியன் டாலர் செலவாகும். அதிலிருந்து ஏவப்படும் ஒரு இன்டர்செப்டர் (Interceptor) ஏவுகணையின் விலை மட்டுமே 12.7 மில்லியன் டாலர்கள் ஆகும்.

இது தவிர சவுதி அரேபியாவின் பிரின்ஸ் சுல்தான் விமானப்படை தளத்தில் நிறுத்தப்பட்டிருந்த 700 மில்லியன் டாலர் மதிப்புள்ள E-3 Sentry உளவு விமானம் மற்றும் எரிபொருள் நிரப்பும் விமானங்கள், குவைத்தின் அலி அல் சலேம் மற்றும் கேம்ப் ஆரிஃப்ஜான் தளங்களில் உள்ள எரிபொருள் கிடங்குகள், விமான நிறுத்துமிடங்கள், தகவல் தொடர்பு சாதனங்கள் மற்றும் ராணுவ வீரர்கள் தங்கும் இடங்கள் என பலவற்றுக்கும் கடும் சேதம் ஏற்பட்டுள்ளதாக செயற்கைக்கோள் புகைப்படங்களில் தெளிவாக பதிவாகியுள்ளது. பென்டகனின் மே மாத அதிகாரப்பூர்வ மதிப்பீட்டின்படி, ‘Operation Epic Fury’ நடவடிக்கையின் மொத்த செலவு 29 பில்லியன் டாலர்கள். இதில் பெரும்பாலான தொகை, சேதமடைந்த உபகரணங்களை சரிசெய்யவும் அல்லது புதியவற்றை வாங்கவுமே செலவிடப்படுகிறது. இதுவரை F-15, F-35 போர் விமானங்கள், 24 MQ-9 Reaper ட்ரோன்கள் மற்றும் ஒரு A-10 போர் விமானம் உட்பட 42க்கும் மேற்பட்ட அமெரிக்க விமானங்கள் அழிக்கப்பட்டுள்ளன அல்லது சேதமடைந்துள்ளன.

விலை உயர்ந்த தொழில்நுட்பங்களைக் கொண்ட அமெரிக்கப் படைகளை எதிர்கொள்ள ஈரான் மிகவும் மலிவான மற்றும் எளிதாக உருவாக்கக்கூடிய ட்ரோன்கள் மற்றும் ஏவுகணைகளையே பயன்படுத்தியுள்ளது. போர் தொடங்கிய ஆரம்ப நாட்களில் அதிக அளவிலான ஏவுகணைகளை ஒரே நேரத்தில் ஏவி அமெரிக்காவின் வான் பாதுகாப்பு அமைப்புகளை முடக்கிய ஈரான், தற்போது மிகக் குறைவான ஆனால் அதிக மதிப்புள்ள இலக்குகளை துல்லியமாக தாக்கும் புதிய உத்திகளுக்கு மாறியுள்ளது என்று ராணுவ நிபுணர்கள் கூறுகின்றனர். இதன் காரணமாக, அங்குள்ள தற்காலிக போர்நிறுத்த ஒப்பந்தம் மீறப்பட்டால், ஏற்கனவே வான் பாதுகாப்பு ஏவுகணைகள் குறைந்துள்ள நிலையில் அமெரிக்க தளங்கள் ஈரானின் அடுத்தகட்ட தாக்குதல்களை சமாளிக்க முடியாமல் பெரும் ஆபத்தை சந்திக்க நேரிடும் என வல்லுநர்கள் எச்சரிக்கின்றனர்.

உலக வல்லரசுகளின் மிக நவீன பாதுகாப்பு தொழில்நுட்பங்கள் கூட சாதாரண, மலிவான ட்ரோன் தாக்குதல்களுக்கு முன்னால் இப்படி திணறுவது, எதிர்கால உலக ராணுவ உத்திகளிலும் அரசியலிலும் எத்தகைய மாற்றத்தை ஏற்படுத்தும் என்று நீங்கள் நினைக்கிறீர்கள்? உங்கள் கருத்துகளை கமெண்டில் ஷேர் பண்ணுங்க. மேலும் பல முக்கிய அப்டேட்ஸ்க்கு நம்ம பேஜை follow பண்ணுங்க.