9/11 அமெரிக்க இரட்டை கோபுரத் தாக்குதல் முன்பும் பின்பும்

நவீன உலக வரலாற்றை செப்டம்பர் 11-க்கு முன், செப்டம்பர் 11-க்கு பின் என்று இரண்டாகப் பிரிக்கலாம். அதுவரை எங்கள் நாட்டின் மீது ஒரு ஈ, காக்கை கூட அத்துமீறிப் பறக்க முடியாது என்று மார்தட்டிக்கொண்டிருந்த அமெரிக்க ஏகாதிபத்தியத்தின் ஆணவக் கோட்டைகள், வெறும் காகிதக் கட்டடங்களாய் சரிந்து விழுந்த நாள் அது!

ஆனால், அந்தத் தாக்குதல் வெறுமனே சில கட்டடங்களை மட்டும் தகர்க்கவில்லை; ஒட்டுமொத்த மத்திய கிழக்கையும் சுடுகாடாக்க அமெரிக்காவுக்குக் கிடைத்த ஒரு மாபெரும் சாக்குப்போக்காகவும் மாறியது. எந்த ஒரு சித்தாந்தத்தின் பெயராலும் அப்பாவிப் பொதுமக்கள் கொல்லப்படுவதை நாம் ஒருபோதும் நியாயப்படுத்த முடியாது; அதே வேளையில் அந்தப் பலிகளை வைத்து அமெரிக்கா ஆடிய வல்லரசு வெறியாட்டத்தையும் நாம் ஏற்க முடியாது.

2001 செப்டம்பர் 11, செவ்வாய்க்கிழமை காலை. 19 கடத்தல்காரர்களால் 4 அமெரிக்கப் பயணிகள் விமானங்கள் கடத்தப்படுகின்றன.

இரண்டு விமானங்கள் நியூயார்க்கின் உலக வர்த்தக மையத்தின் (WTC) இரட்டைக் கோபுரங்களைத் தாக்கித் தகர்க்கின்றன.

மூன்றாவது விமானம் அமெரிக்க ராணுவத்தின் தலைமையகமான பென்டகன் மீது மோதுகிறது.

நான்காவது விமானம் பயணிகளின் போராட்டத்தால் பென்சில்வேனியா வயல்வெளியில் விழுகிறது.

வெறும் 102 நிமிடங்களுக்குள் இரட்டைக் கோபுரங்கள் தரைமட்டமாகின. சுமார் 2,996 அப்பாவி மக்கள் கொல்லப்பட்டனர். அமெரிக்காவின் வான்பகுதி முழுமையாக மூடப்பட்டது. உலகப் பங்குச்சந்தைகள் உறைந்துபோயின. ‘உலகத்துக்கே நாங்கள்தான் போலீஸ்’ என்று நினைத்த அமெரிக்கா, தன் சொந்த வீட்டிலேயே பாதுகாப்பற்றது என்ற நிதர்சனம் உலகிற்கு அம்பலமானது.

9/11 தாக்குதலை அடுத்து அமெரிக்க அதிபர் ஜார்ஜ் டபிள்யூ. புஷ் அறிவித்த ஒரு வார்த்தைதான் “War on Terror” (பயங்கரவாதத்திற்கு எதிரான போர்). இந்த ஒரு வார்த்தையை வைத்துக்கொண்டு அடுத்த 20 ஆண்டுகள் அமெரிக்கா ஆடிய வெறியாட்டம் வரலாற்றின் ஆகப்பெரிய கரும்புள்ளி ஆகும்.

அல்கொய்தாவை அழிப்பதாகக் கூறி 2001-ல் ஆப்கானிஸ்தானை ஆக்கிரமித்தது. 2003-ல் ‘பேரழிவு ஆயுதங்கள்’ இருப்பதாக ஒரு அப்பட்டமான பொய்யைச் சொல்லி ஈராக்கை ஆக்கிரமித்தது. இந்த இரண்டு போர்களிலும் கொல்லப்பட்ட அப்பாவி முஸ்லிம்களின் எண்ணிக்கை பல லட்சங்களைத் தாண்டும்!

அமெரிக்காவிற்குள்ளேயே மனித உரிமைகள் நசுக்கப்பட்டன. ‘பாதுகாப்பு’ என்ற பெயரில், மக்களின் தொலைபேசி உரையாடல்கள், மின்னஞ்சல்கள் ஆகியவற்றை ஒட்டுக்கேட்க உளவு அமைப்புகளுக்கு (NSA) அளவற்ற அதிகாரம் வழங்கப்பட்டது.

உலகெங்கும் முஸ்லிம்கள் சந்தேகக் கண்களோடு பார்க்கப்பட்டனர். குவாண்டனாமோ பே போன்ற சித்திரவதை முகாம்களை உருவாக்கி, விசாரணையே இன்றிப் பலரை அமெரிக்கா அடைத்துச் சித்திரவதை செய்தது.

9/11 தாக்குதல் அல்கொய்தாவால் நடத்தப்பட்டது என்பது அதிகாரப்பூர்வ அறிக்கை என்றாலும், “இது அமெரிக்காவே தனக்குத்தானே நடத்திக்கொண்ட தாக்குதல்” என்ற வலுவான சதி கோட்பாடுகள் இன்றுவரை ஓய்ந்தபாடில்லை. அதற்குப் புவிசார் அரசியல் ஆய்வாளர்கள் வைக்கும் முக்கிய வாதங்களும் பல உள்ளன.

9/11-க்கு சில ஆண்டுகளுக்கு முன், அமெரிக்காவின் ஆதிக்கத்தை நிலைநிறுத்துவதற்காக உருவாக்கப்பட்ட ‘PNAC’ (Project for the New American Century) என்ற அமைப்பின் அறிக்கை ஒன்று வெளியானது. அதில், “அமெரிக்கா தனது ராணுவ ஆதிக்கத்தை உலகெங்கும் விரிவுபடுத்த வேண்டும் என்றால், ‘பெர்ல் ஹார்பர்’ தாக்குதல் போன்ற ஒரு மாபெரும் பேரழிவு நடந்தாலொழிய மக்கள் போரை ஆதரிக்க மாட்டார்கள்” என்று குறிப்பிடப்பட்டிருந்தது. அவர்கள் கேட்டபடியே 9/11 நடந்தது!

எந்த ஒரு விமானமும் மோதாத நிலையில், 47 மாடிகள் கொண்ட ‘கட்டடம் 7’ எப்படித் தரைமட்டமானது? அது திட்டமிட்டு வைக்கப்பட்ட வெடிகுண்டுகளால் (Controlled Demolition) தகர்க்கப்பட்டதைப் போலவே சரிந்தது இன்றுவரை விடைதெரியாத மர்மம்.

உலகின் மிகக் கடுமையான பாதுகாப்பு கொண்ட பென்டகன் கட்டடத்தின் மீது விமானம் மோதியதற்கான எந்தவொரு சிசிடிவி (CCTV) காட்சியும் இன்றுவரை முழுமையாக வெளியிடப்படவில்லை. விழுந்தது விமானம் தானா என்ற சந்தேகமும் உண்டு.

9/11 தாக்குதலுக்குப் பிறகு வெடித்த போர்களால் பில்லியன் கணக்கான டாலர்களை லாபமாகச் சுருட்டியது யார் தெரியுமா? அமெரிக்காவின் ஆயுதத் தயாரிப்பு நிறுவனங்களான லாக்ஹீட் மார்ட்டின் , போயிங் மற்றும் ரேத்தியான் ஆகிய நிறுவனங்கள்தான்.

அலுவலகத்திற்கு வேலைக்குச் சென்ற அப்பாவிகளும், மீட்புப் பணிக்காகச் சென்ற தீயணைப்பு வீரர்களும் 9/11 அன்று அநியாயமாகக் கொல்லப்பட்டதை எவ்விதக் காரணத்தைக் கொண்டும் நியாயப்படுத்தக் கூடாது. அப்பாவி மக்களைக் கொல்வது பயங்கரவாதம்; அதை எந்த மதமும், சித்தாந்தமும் ஆதரிக்க முடியாது.

ஆனால், நியூயார்க்கில் சிந்தப்பட்ட 3,000 பேரின் ரத்தத்திற்குப் பழிவாங்குகிறோம் என்ற பெயரில், அமெரிக்க ஏகாதிபத்தியம் ஈராக்கிலும், ஆப்கானிஸ்தானிலும், சிரியாவிலும் லட்சக்கணக்கான அப்பாவிப் பெண்களையும் குழந்தைகளையும் கொன்று குவித்ததே… அது அதைவிடப் பெரிய ‘அரச பயங்கரவாதம்’ (State-sponsored Terrorism).

9/11 ஒரு கொடூரமான தாக்குதல்! ஆனால் அந்தத் தாக்குதலை அமெரிக்கா தனது உலக ஆதிக்கத்திற்கான ஒரு முதலீடாகவே பயன்படுத்திக் கொண்டது என்பதுதான் சர்வதேச அரசியலின் இருண்ட யதார்த்தம்!

✍️ Abdullah Ibnu Naseer