அமெரிக்காவுக்கு எதிரான போருக்கு தயாராகும் ஈரானிய பெண்கள்

அமெரிக்கா மற்றும் இஸ்ரேலுடனான மோதல் தீவிரமடைந்துள்ள நிலையில், சாத்தியமான தரைவழித் தாக்குதலை எதிர்கொள்வதற்காக ஈரான் தனது நாட்டுப் பெண்களுக்கு தீவிர இராணுவப் பயிற்சிகளை வழங்கத் தொடங்கியுள்ளதாக சர்வதேச ஊடகங்கள் செய்தி வெளியிட்டுள்ளன.

தாய்நாட்டைப் பாதுகாப்பதற்காக ஈரான் அரசாங்கம் முன்னெடுத்து வரும் ‘ஜன்பதா’ ( உயிர்த்தியாகம்) எனப்படும் மக்கள் திரள் இயக்கத்தின் ஒரு பகுதியாக இந்தப் பயிற்சிகள் இடம்பெற்று வருவதாக தெரிவிக்கப்பட்டுள்ளது.

ஈரான் தலைநகர் தெஹ்ரானில் உள்ள வரலாற்றுச் சிறப்புமிக்க இமாம் ஹுசைன் சதுக்கம் மற்றும் முக்கிய இராணுவ முகாம்களில் பெண்களுக்கான விசேட இராணுவப் பயிற்சிகள் ஆரம்பிக்கப்பட்டுள்ளதாக கூறப்படுகிறது.

இஸ்லாமிய புரட்சிகர காவல் படை (IRGC) மற்றும் பாசிஜ் (Basij) தன்னார்வப் படையினர் ஆகியோரின் நேரடி மேற்பார்வையில் இந்தப் பயிற்சிகள் முன்னெடுக்கப்படுவதாக தெரிவிக்கப்பட்டுள்ளது.

பாரம்பரிய ஈரானிய ஆடையான ‘சாதர்’ அணிந்த நூற்றுக்கணக்கான பெண்கள் இப்பயிற்சிகளில் பங்கேற்றுள்ளனர்.

அவர்களுக்கு துப்பாக்கிகளைப் பிரித்து மீண்டும் பொருத்துதல், இலக்கை நோக்கி சுடுதல் உள்ளிட்ட அடிப்படை ஆயுதப் பயிற்சிகள் வழங்கப்படுவதாக தெரிவிக்கப்பட்டுள்ளது.

மேலும், போர்க்களங்களில் பயன்படுத்தப்படும் FPV ட்ரோன்கள் மற்றும் டாங்கி எதிர்ப்பு ஏவுகணைகளை இயக்குதல், கடினமான நிலப்பரப்புகளில் செயல்படுதல், கொரில்லா போர் முறைகள், முதலுதவி மற்றும் அவசரகால மீட்பு நடவடிக்கைகள் உள்ளிட்ட பயிற்சிகளும் வழங்கப்படுவதாக கூறப்படுகிறது.

வெளிநாட்டுத் தாக்குதல்களில் இருந்து நாட்டைப் பாதுகாப்பதற்காக ஈரான் முழுவதும் சுமார் 1,000 தன்னார்வத் தற்காப்புப் படைப் பிரிவுகளை உருவாக்க அந்நாட்டு அரசாங்கம் இலக்கு நிர்ணயித்துள்ளதாகவும் தெரிவிக்கப்பட்டுள்ளது.

ஈரான் ஊடகங்களின் தகவலின்படி, ‘ஜன்பதா’ இயக்கத்தில் இதுவரை சுமார் 3.1 கோடி பொதுமக்கள் பதிவு செய்துள்ளதாகவும், அவர்களில் 32 சதவீதம் பேர் பெண்கள் என்றும் தெரிவிக்கப்பட்டுள்ளது.

“ஒரு நாட்டின் அமைதிக்கும் தற்காப்பிற்கும் அதன் மக்களின் தயார்நிலையே மிக முக்கியமான காரணியாகும்” என இந்த அமைப்பின் பயிற்சியாளர்கள் தெரிவித்துள்ளதாக ஈரான் ஊடகங்கள் குறிப்பிட்டுள்ளன.