இலங்கையில் அதிகரித்துள்ள எச்.ஐ.வி பாதிப்பு…!!!

இலங்கையில் பதிவாகியுள்ள எச்.ஐ.வி பாதிப்புகளில் கணிசமானவை போதைப்பொருளுக்கு அடிமையானவர்களிடையே அடையாளம் காணப்பட்டுள்ளதாக சுகாதார அமைச்சர் மருத்துவர் நலிந்த ஜயதிஸ்ஸ தெரிவித்தார்.

இன்று (6) நடைபெற்ற வாராந்திர அமைச்சரவை முடிவுகளை அறிவிக்கும் ஊடகவியலாளர் சந்திப்பில் கலந்துகொண்டு கருத்துத் தெரிவித்த அவர், பெண்களை விட ஆண்களிடமே எச்.ஐ.வி பாதிப்பு அதிகமாகக் காணப்படுவதாகக் கிடைக்கப்பெற்ற தரவுகள் சுட்டிக்காட்டுவதாகவும் குறிப்பிட்டார்.

2025 ஆம் ஆண்டில் இலங்கையில் 874 புதிய எச்.ஐ.வி பாதிப்புகள் பதிவாகியுள்ளதாகக் கூறிய அவர், இவ்வருடத்தில் இதுவரை பதிவாகியுள்ள பாதிப்புகளின் எண்ணிக்கை கடந்த ஆண்டின் எண்ணிக்கையை இன்னும் தாண்டவில்லை என்றும் தெரிவித்தார். இருப்பினும், ஆண்டின் இறுதிக்குள் இந்த எண்ணிக்கை அதிகரிக்கக்கூடும் என்ற அச்சம் நிலவுவதாகவும் அமைச்சர் குறிப்பிட்டார்.

அமைச்சர் ஜயதிஸ்ஸவின் கூற்றுப்படி, போதைப்பொருள் பாவனையாளர்களிடையே எச்.ஐ.வி பாதிப்புகள் அதிகளவில் பதிவாகியுள்ளதோடு, அதே குழுவினரிடையே ஹெபடைடிஸ் பி (Hepatitis B) பாதிப்புகளும் அடையாளம் காணப்பட்டுள்ளன.

போதைப்பொருள் பாவனையால் ஏற்படும் ஆபத்துகள் மற்றும் எச்.ஐ.வி பரவல் குறித்து சம்பந்தப்பட்ட குழுக்களிடையே விழிப்புணர்வை ஏற்படுத்த அதிகாரிகள் நடவடிக்கை எடுத்து வருவதாகவும் அவர் கூறினார்.