சவுதி அரேபியா மீது ஈரான் இருமுனைத் தாக்குதல்: நெருக்கடியில் மத்திய கிழக்கு

ஈரான் ஆதரவுப் படைகளிடமிருந்து இருமுனைத் தாக்குதல் ஒன்று விரைவில் நிகழக்கூடும் என்று சவுதி எதிர்பார்க்கிறது.

ஈராக்கிய போராளிக் குழுக்களிடமிருந்தும், ஏமன் ஹவுதிகளிடமிருந்தும், ஈரானால் ஒருங்கிணைக்கப்பட்ட தாக்குதல் ஒன்று நிகழும் என சவுதி அரேபியா எதிர்பார்க்கிறது.

உளவுத்துறை அறிக்கை

இது தொடர்பில் அதிகாரி ஒருவர் தெரிவிக்கையில், எரிசக்தி உள்கட்டமைப்பு, துறைமுகங்கள் மற்றும் விமான நிலையங்கள் உள்ளிட்ட பொதுமக்கள் மற்றும் பொருளாதாரத் தளங்கள் குறிவைக்கப்படலாம் என்று சவுதி அரேபியா, அமெரிக்கா மற்றும் பிற பிராந்திய நாடுகளிலிருந்து வந்த உளவுத்துறை அறிக்கைகள் சுட்டிக்காட்டியுள்ளதாக குறிப்பிட்டுள்ளார்.

மேலும், ட்ரோன்கள் மற்றும் ஏவுகணைகள் இடம் மாற்றப்படுவதை சவுதி அரேபியா அவதானித்ததாகவும், இது இரு திசைகளிலிருந்தும் ஒருங்கிணைந்த தாக்குதல் நடவடிக்கைகள் மேற்கொள்ளப்படுவதைக் குறிப்பதாகவும், எந்தவொரு ஆக்கிரமிப்புக்கும் பதிலடி கொடுக்கத் தேவையான அனைத்து நடவடிக்கைகளையும் சவுதி அரேபியா மேற்கொள்ளத் தயாராக இருப்பதாகவும் அந்த அதிகாரி தெரிவித்துள்ளார்.

இந்த அரிதான எச்சரிக்கையானது, கடந்த சில வாரங்களாக சவுதி அரேபியா பிராந்திய மோதலின் இலக்காக எவ்வாறு அதிகளவில் மாறியுள்ளது என்பதை அடிக்கோடிட்டுக் காட்டுவதாகவே கூறுகின்றனர்.

அச்சுறுத்தல்கள் அதிகரித்து வரும் நிலையில், சவுதி அரேபியா, பாகிஸ்தான் மற்றும் துருக்கி ஆகிய மூன்று முக்கிய சுன்னி முஸ்லிம் சக்திகளுக்கு இடையிலான கூட்டணியை வலுப்படுத்தும் விதமாக, வெள்ளிக்கிழமை அன்று மெக்காவில் ஒரு கூட்டுப் பாதுகாப்பு ஒப்பந்தத்தில் கையெழுத்திடும் என இவ்விவகாரம் குறித்த தகவலறிந்த வட்டாரங்கள் தெரிவிக்கின்றன.

சீர்குலைக்கும் நோக்கம்

இதனிடையே, பதற்றத்தைத் தணிக்கவும் பேச்சுவார்த்தை மூலம் தீர்வு காணவும் சவுதி அரேபிய நிர்வாகம் தொடர்ந்து முயற்சித்து வரும் நிலையில், அச்சுறுத்தல்கள் குறித்த தகவல்கள் குறிப்பாகக் கவலைக்குரியதாக இருப்பதாக சவுதி அதிகாரி ஒருவர் தெரிவித்துள்ளார்; மேலும், ஈரான் உள்ளிட்ட அனைத்துத் தரப்பினருடனான தொடர்புகளும் மத்தியஸ்த முயற்சிகளும் சரியான திசையில் செல்வதாகவும் அவர் குறிப்பிட்டார்.

 

மேலும், திட்டமிடப்பட்ட தாக்குதல்கள் அந்த சமாதான முயற்சிகளைச் சீர்குலைக்கும் நோக்கம் கொண்டவையாக இருக்கலாம் என்றும் அந்த அதிகாரி கூறியுள்ளார்.

இந்த நிலையில், ஈரான் தொடர்பான போரை முடிவுக்குக் கொண்டுவருவதற்கான விரிவான பேச்சுவார்த்தைகளுக்கு வழிவகுக்கும் வகையிலான தற்காலிக ஏற்பாட்டின் கீழ், ஹார்முஸ் நீரிணையை மீண்டும் திறப்பதற்கான ஒப்பந்தத்தை எட்டுவதற்கு வளைகுடா நாடுகளும் ஈரானும் ஒப்புக்கொண்டுள்ளதாகப் பிராந்திய அதிகாரிகள் தெரிவித்துள்ளனர்.