ஷிரந்தியின் ‘சிரிலிய’ வங்கிக் கணக்கு : கோடிக்கணக்கில் பரிமாறப்பட்ட பணம்

ஷிரந்தி ராஜபக்சவுடன் தொடர்புடையதாகக் கூறப்படும் ‘சிரிலிய’ வங்கிக் கணக்கில் இடம்பெற்றதாகக் கூறப்படும் கோடிக்கணக்கான ரூபாய் பணப் பரிமாற்றங்கள் தொடர்பில் விசாரணைகள் முன்னெடுக்கப்பட்டு வருகின்றன.

குறிப்பாக, 88 சந்தர்ப்பங்களில் குறித்த கணக்கிற்கு 82,09,089 ரூபாய் பணம் வரவு வைக்கப்பட்டுள்ளதாகவும், மேலும் 129 சந்தர்ப்பங்களில் 39,651,000 ரூபாய் வரவு வைக்கப்பட்டுள்ளதாகவும் தகவல்கள் வெளியாகியுள்ளன. அந்த 129 சந்தர்ப்பங்களிலும் வரவு வைக்கப்பட்ட பணம் உடனடியாக மீளப் பெறப்பட்டதாகக் கூறப்படுகிறது.

மர்மங்கள் நிறைந்த பண பரிமாற்றம்

இந்தப் பணத்தை யார் வழங்கினர், எந்த நோக்கத்திற்காக கணக்கில் வைப்புச் செய்யப்பட்டது, பின்னர் ஏன் உடனடியாக மீளப் பெறப்பட்டது என்பது தொடர்பில் விசாரணையாளர்கள் கவனம் செலுத்தியுள்ளதாக தெரிவிக்கப்படுகிறது.

மேலும், குறித்த கணக்குடன் தொடர்புடைய நிலையான வைப்புக் கணக்கில் சுமார் 100 மில்லியன் ரூபாய் இருந்ததாகவும் தகவல்கள் வெளியாகியுள்ளன.

2016ஆம் ஆண்டளவில் இந்தக் கணக்கு தொடர்பான ஆவணங்கள் சட்டமா அதிபரின் ஆலோசனைக்காக அனுப்பப்பட்டிருந்ததாகவும், பின்னர் தற்போதைய அரசாங்கத்தின் கீழ் விசாரணைகளை முன்னெடுப்பதற்கான நடவடிக்கைகள் மேற்கொள்ளப்பட்டதாகவும் கூறப்படுகிறது.

இதனிடையே, குறித்த கணக்கிலிருந்து வேறு பல வங்கிக் கணக்குகளுக்கும் பணம் பரிமாற்றம் செய்யப்பட்டுள்ளதாகவும், கணக்குடன் தொடர்புடைய சில ஆவணங்கள் காணாமல் போயுள்ளதாகவும் தகவல்கள் வெளியாகியுள்ளன.

மேலும், ‘சிரிலிய’ கணக்கு மூன்று பெயர்களின் கீழ் ஆரம்பிக்கப்பட்டதாகக் கூறப்படும் நிலையில், ஷிரந்தி ராஜபக்சவின் பெயர் தொடர்பிலும் கேள்விகள் எழுந்துள்ளன.

குறிப்பாக, குறித்த வங்கிக் கணக்கில் “எஸ். ராஜபக்ச” என்ற பெயர் பயன்படுத்தப்பட்டுள்ளதாகத் தெரிவிக்கப்படுகிறது. இந்நிலையில், இந்தப் பணப் பரிமாற்றங்களின் மூலம், நோக்கம் மற்றும் பயனாளிகள் யார் என்பது தொடர்பில் முன்னெடுக்கப்படும் விசாரணைகளின் முடிவுகள் முக்கியத்துவம் பெறுகின்றன.