கார்க் தீவை கைப்பற்ற துடிக்கும் அமெரிக்காவின் அதிர்ச்சி பின்னணி!!!

கார்க் தீவை மட்டும் கைப்பற்றினால் ஈரானே முடங்கிவிடும்! அமெரிக்கா குறி வைப்பதன் அதிர்ச்சி பின்னணி

ஈரானின் ஒட்டுமொத்தப் பொருளாதாரமும் பாரசீக வளைகுடாவில் உள்ள ‘கார்க்’ (Kharg Island) எனும் சிறிய தீவிலேயே தங்கியுள்ளது. வெறும் 20 சதுர கிலோமீட்டர் பரப்பளவைக் கொண்ட இந்தத் தட்டையான தீவு, ஈரானின் 90 சதவீத கச்சா எண்ணெய் ஏற்றுமதியைக் கையாளும் மிக முக்கியமான மையமாகும்.

ஈரானை முடக்கி, பேச்சுவார்த்தைக்குப் பணிய வைக்க வேண்டுமானால் இந்தத் தீவைக் கைப்பற்றுவது அவசியம் என அமெரிக்க அதிபர் டொனால்ட் ட்ரம்ப் கருதுகிறார். இதற்காக ஆயிரக்கணக்கான அமெரிக்க கடற்படை வீரர்கள் (US Marines) மற்றும் வான்குடை வீரர்கள் ஏற்கனவே மத்திய கிழக்கு பிராந்தியத்திற்கு வந்துள்ளனர்.

கார்க் தீவு ஈரானின் முக்கிய நகரமான புஷெர் (Bushehr) மற்றும் அதன் அணுமின் நிலையத்திற்கு மிக அருகில் அமைந்துள்ளது. இத்தீவில் எண்ணெய் கிணறுகள் இல்லாவிட்டாலும், நிலப்பரப்பிலிருந்து வரும் குழாய்கள் மூலம் இங்கு சேகரிக்கப்படும் 28 மில்லியன் பேரல் எண்ணெயை ஒரே நேரத்தில் சேமித்து வைக்கும் வசதி உள்ளது.

அண்மையில் அமெரிக்கா இத்தீவின் மீது வான்வழித் தாக்குதல் நடத்தி ஈரானின் ஏவுகணைத் தளங்களை அழித்த போதிலும், எண்ணெய் சேமிப்பு கிடங்குகளைச் சிதைக்கவில்லை. இத்தீவைச் சேதமின்றி கைப்பற்றி, அதன் மூலம் ஈரானை ‘பிளாக்மெயில்’ செய்வதே அமெரிக்காவின் உண்மையான திட்டமாகும்.

ஆனால், இத்தீவைக் கைப்பற்றுவது அமெரிக்காவிற்கு அவ்வளவு எளிதானது அல்ல. உலகப்புகழ் பெற்ற ‘ஹார்முஸ் நீரிணையை கடந்து செல்லும்போதே, ஈரானின் ஏவுகணைகள் மற்றும் அதிவேகப் படகுகளின் தாக்குதலுக்கு அமெரிக்கக் கப்பல்கள் முகம் கொடுக்க வேண்டியிருக்கும்.

ஒருவேளை அமெரிக்கப் படைகள் தீவுக்குள் தரையிறங்கினாலும், அங்கு மறைத்து வைக்கப்பட்டுள்ள கண்ணிவெடிகள் மற்றும் வான் பாதுகாப்பு அமைப்புகள் பெரும் அச்சுறுத்தலாக இருக்கும். மேலும், அங்கு வசிக்கும் 8,000-க்கும் மேற்பட்ட பொதுமக்களையும் கட்டுப்படுத்துவது இராணுவ ரீதியாகப் பெரும் சவாலாகும்.

இத்தீவு ஈரானின் நிலப்பரப்பில் இருந்து வெறும் 25 கி.மீ தூரத்திலேயே இருப்பதால், ஈரானிய இராணுவத்தின் கனரக பீரங்கிகள் தீவின் மீது நேரடியாகத் தாக்குதல் நடத்த முடியும். குறிப்பாக, ஈரானின் நவீன ட்ரோன் தொழில்நுட்பம் அமெரிக்க வீரர்களுக்குப் பெரும் உயிர்ச்சேதத்தை விளைவிக்கக்கூடும்.

தற்போதைய நிலவரப்படி, அமெரிக்காவிடம் சுமார் 8,000 முதல் 18,000 வரையிலான வீரர்களே இப் பகுதியில் உள்ளனர். ஆனால், ஈரானிடம் 5 இலட்சத்திற்கும் மேற்பட்ட படையினரும், பல இலட்சம் துணை இராணுவப் பிரிவினரும் (Basij) இருப்பதால், எண்ணிக்கையில் அமெரிக்கா மிகவும் பின்தங்கியுள்ளது.

போரில் ஏற்படும் உயிர்ச்சேதங்களை அமெரிக்க மக்கள் விரும்புவதில்லை. ஏற்கனவே 13 வீரர்கள் உயிரிழந்தது அமெரிக்க அரசியலில் பெரும் கொந்தளிப்பை ஏற்படுத்தியுள்ளது. இந்த பலவீனத்தை அறிந்த ஈரான், அமெரிக்க வீரர்களுக்கு அதிக உயிர்ச்சேதத்தை உண்டாக்கி அதன் மூலம் அமெரிக்காவைத் பின்வாங்கச் செய்யும் உத்தியைக் கையாளுமெனத் தெரிகிறது.

ஒட்டுமொத்தமாகப் பார்க்கையில், கார்க் தீவு அமெரிக்காவிற்கு ஒரு தங்கச் சுரங்கம் போலத் தெரிந்தாலும், அது ஒரு மரணப் பொறியாக மாறவும் வாய்ப்புள்ளது. ஈரானின் இந்த மிக ரகசியமான தீவைக் கைப்பற்ற அமெரிக்கா எடுக்கும் முயற்சி, வரலாற்றின் மிகக் கடினமான போராக அமையலாம் என நிபுணர்கள் கருதுகின்றனர்.