தோல்வி பயத்தில் நெதன்யாகு…!!!

Netanyahu Shares AI Image Of Nuclear Blast In Tel Aviv: டெல் அவீவில் அணு குண்டு தாக்குதல் போன்ற AI படத்தைப் பகிர்ந்துள்ளார் நெதன்யாகு.

இஸ்ரேல் தேர்தலுக்கு இரண்டு நாட்களே எஞ்சியுள்ள நிலையில், பிரதமர் பெஞ்சமின் நெதன்யாகு, டெல் அவிவ் நகரின் மீது அணு குண்டு தாக்குதல் போன்ற, செயற்கை நுண்ணறிவு (AI) மூலம் உருவாக்கப்பட்ட ஒரு படத்தைச் சமூக ஊடகங்களில் பகிர்ந்துள்ளார்.

அத்துடன், அமெரிக்க ஜனாதிபதி டொனால்ட் ட்ரம்பின் பதவிக்காலத்தில் எஞ்சியுள்ள இரண்டு ஆண்டுகளை, ஈரானிடமிருந்து இஸ்ரேலுக்கு ஏற்பட்டுள்ள இருப்புக்கே ஆபத்தான அச்சுறுத்தலை எதிர்கொள்ள இஸ்ரேல் பயன்படுத்திக்கொள்ள வேண்டும் என்றும் நெதன்யாகு கூறியுள்ளார்.

அந்தப் படத்துடன், இஸ்ரேலிய எழுத்தாளரும் அரசியல் விமர்சகருமான யுவால் ப்ளம்பர்க்கின் அறிக்கை ஒன்றையும் நெதன்யாகு பகிர்ந்திருந்தார். அதில், இஸ்ரேல் தேசம் உண்மையான மற்றும் கண்கூடான இருப்புக்கே அச்சுறுத்தலில் உள்ளது.

ஈரானியர்கள் அணு ஆயுதங்களைப் பெற்றால், இனி எதுவும் முன்போல் இருக்காது. ஈரான் மற்றும் ஷியா கூட்டணியால் ஏற்படும் இருப்புக்கே ஆபத்தான அச்சுறுத்தலுடன் ஒப்பிடும்போது மற்ற அனைத்தும் மிகவும் அற்பமானவை.

அவ்வப்போது உருவாகும் திட்டமிட்டு உருவாக்கப்பட்ட புயல்கள், மிகவும் முக்கியமான ஒன்றான ஈரானில் பணிகளை முடிப்பதிலிருந்து கவனத்தைத் திசை திருப்புவதற்காகவே வடிவமைக்கப்பட்டுள்ளன. இது இங்குள்ள ஒவ்வொரு நபரின் பௌதிக இருப்புடன் தொடர்புடையது எனவும் யுவால் ப்ளம்பர்க் குறிப்பிட்டுள்ளார்.

அத்துடன், ஈரானுக்கு எதிரான நடவடிக்கைகளை நாம் முடிப்பதற்கு ட்ரம்ப் பதவியின் கீழ் இன்னும் இரண்டு ஆண்டுகள் உள்ளன; அதற்குப் பிறகு என்ன நடக்கும் என்று சொல்ல முடியாது, அது கமலா ஹாரிஸாக இருக்கலாம் அல்லது வேறு ஏதேனும் ஒரு அடையாளம் தெரியாத நபராக இருக்கலாம்.

வரும் ஆண்டுகளில் நமது பௌதிக இருப்பை உறுதி செய்வதற்கான அவசியமான பணிகளை நிறைவு செய்ய நமக்கு எஞ்சியுள்ள கால அவகாசம் இதுவே.

அரசின் தேவையான அனைத்து வளங்களும் இந்த இலட்சியப் பணியில் முதலீடு செய்யப்பட வேண்டும் என நெதன்யாகு சமூக ஊடகத்தில் பதிவு செய்துள்ளார்.

ஆனால், நெதன்யாகுவின் பதிவிற்கு உடனடியாகவே எதிர்க்கட்சிகளிடம் இருந்து கடுமையான விமர்சனம் எழுந்தது. தேர்தல் நாள் நெருங்கி வருவதால், தோல்வி பயத்தில் நெதன்யாகு கட்டுப்பாட்டை இழந்து வருவதாக ஜனநாயகக் கட்சியின் தலைவர் யாயிர் கோலன் குற்றம் சாட்டினார்.

இஸ்ரேலின் பிரதமர் டெல் அவிவ் நகரின் மீது அணு குண்டு தாக்குதல் போன்ற ஒரு படத்தைப் பதிவிட்டுள்ளார். அவரைச் சமூக ஊடகங்களிலிருந்து விலக்கி வைக்க வேண்டும் என்று கேட்டுக்கொள்கிறேன்.

அவரும் அவரைச் சுற்றியுள்ளவர்களும் மனநிலை பிறழ்ந்துவிட்டனர். தோல்வி பயம் அதிகரித்து வருகிறது என்று கோலன் கூறியுள்ளார். யாஷார் (Yashar) அமைப்பின் தலைவர் காடி ஐசென்கோட் தனது பதிவில்,

நெதன்யாகுவிடமிருந்து மீண்டும் ஒரு அச்சுறுத்தும் பதிவு. நீங்கள் மிகுந்த பதற்றத்தில் இருக்கிறீர்கள். ஒவ்வொரு தேர்தல் பிரச்சாரத்திலும் நடப்பது போலவே, தற்போதும் பொய்களையும் அச்சமூட்டும் உத்திகளையும் அவர் மீண்டும் கையாளுகிறார் என்று குறிப்பிட்டுள்ளார்.

இஸ்ரேலில் செவ்வாய்க்கிழமை தேர்தல் நடைபெறுகிறது. அந்நாட்டில் விகிதாசாரப் பிரதிநிதித்துவ முறைப்படி வாக்குப்பதிவு நடைபெறுகிறது; 120 இடங்களைக் கொண்ட நாடாளுமன்றத்தில் பெரும்பான்மை பெறுவதற்கு ஒரு கட்சிக்கு 61 இடங்கள் தேவைப்படுகின்றன.

வெளியாகியுள்ள இதுவரையானக் கருத்துக் கணிப்புகளில், நெதன்யாகு ஆட்சியைத் தக்கவைக்கும் வாய்ப்புகள் குறைவு என்றே தெரிய வருகிறது. அல்லது மிகப்பெரிய கூட்டணி ஒன்றை அமைக்க வேண்டியிருக்கும் என்றும் கூறுகின்றனர்.