பனிக்கு அடியில் 3.4 கோடி ஆண்டுகளுக்கு முன் புதைந்த காடு..!!

கிழக்கு அந்தாட்டிகாவில் சுமார் 2 கிலோமீட்டர் தடிமனான பனிப்பாறைக்கு அடியில், கிட்டத்தட்ட 3.4 கோடி (34 மில்லியன்) ஆண்டுகள் மறைந்திருந்த ஒரு பண்டைய இயற்கை நிலப்பரப்பை அறிவியலாளர்கள் கண்டுபிடித்துள்ளனர்.

பூமி பனிப் பாலைவனமாக மாறுவதற்கு முன்பு எப்படி இருந்தது என்பதைப் பாதுகாத்து வைத்துள்ள ஒரு “காலப் பெட்டகமாக” (Time capsule) இது திகழ்கிறது.

செயற்கைக்கோள் ரேடார் மற்றும் வான்வழி ரேடார் ஸ்கேனிங் தொழில்நுட்பங்களைப் பயன்படுத்தி, அமெரிக்காவின் மேரிலாண்ட் (Maryland) மாநிலத்தின் அளவிற்கு இணையான பரப்பளவில் உள்ள உயர் குன்றுகள் மற்றும் ஆழமான பள்ளத்தாக்குகளை ஆராய்ச்சியாளர்கள் வரைபடமாக்கியுள்ளனர்.

அந்தாட்டிகா ‘கோண்ட்வானா’ (Gondwana) பெருங்கண்டத்தின் ஒரு பகுதியாக இருந்த காலத்தில், அடர்ந்த காடுகளாலும் ஓடும் நதிகளாலும் சூழப்பட்டிருந்தபோது இந்த நதிகள் பள்ளத்தாக்குகளை உருவாக்கின.

சுமார் 3.4 கோடி ஆண்டுகளுக்கு முன்பு (ஈயோசீன் – ஓலிகோசீன் மாற்றத்தின் போது), உலகளாவிய வெப்பநிலை கணிசமாகக் குறைந்ததால் மிகப்பெரிய பனிப்படலங்கள் உருவாகி, இந்த நிலப்பரப்பை அப்படியே உறைந்துபோகச் செய்து இன்றுவரை பாதுகாத்து வைத்துள்ளன.

இப்பகுதியை மூடியுள்ள பனி அடிப்பகுதி வரை முழுமையாக உறைந்துள்ளதால், மற்ற பகுதிகளைப் போல பனிப்பாறைகள் நகர்ந்து அடியிலுள்ள நிலத்தை அரித்துச் செல்லவில்லை. இதனால் இந்த பண்டைய இயற்கை நிலப்பரப்பு எந்த மாற்றமும் இன்றி அதே நிலையில் பாதுகாக்கப்பட்டுள்ளது.

அந்தாட்டிகா உறைவதற்கு முன்பு எப்படி இருந்தது என்பதைப் புரிந்துகொள்ளவும், மில்லியன் கணக்கான ஆண்டுகளில் காலநிலை மாற்றத்திற்கு ஏற்ப பனிப்படலங்கள் எவ்வாறு மாறியுள்ளன என்பதை ஆராயவும் இது அறிவியலாளர்களுக்கு ஒரு அரிய வாய்ப்பை வழங்குகிறது. மேலும், எதிர்காலத்தில் துருவப் பனி உருகுவது மற்றும் உலகளாவிய கடல் நீர்மட்டம் உயர்வது குறித்த துல்லியமான கணிப்புகளுக்கும் இது உதவும்.