புகழ்பெற்ற திரைப்பட இயக்குனர் கொரோனா தொற்றால் உயிரிழப்பு!

புகழ்பெற்ற தென்கொரிய திரைப்பட இயக்குனர் கிம் கி டக் (Kim Ki-duk) கொரோனாவால் இன்று அதிகாலை உயிரிழந்ததாக அறிவிக்கப்பட்டுள்ளது.
59 வயதான கிம் கி டக்-இன் இந்த எதிர்பாராத மரணம், எல்லைகளை கடந்து திரைப்படங்களை நேசிக்கும் ரசிகர்களை சோகத்தில் ஆழ்த்தியுள்ளது.

மனித மனங்களின் சிக்கலான உளவியல் தன்மைகளை தனது படங்களில் நுட்பமாக கையாண்டவர் கிம் கி டக்.

இவரது படங்களான ‘3-அயன்’, ‘டைம்’, ‘பேட் கை’, ‘ஸ்பிரிங், சம்மர், பால், விண்டர்… அன்ட் ஸ்பிரிங்’ போன்றவை உலகளவில் பெரும் வரவேற்பைப் பெற்றன.

சர்வதேச திரைப்பட விழாக்களில் கிம் கி டக் இயக்கிய திரைப்படங்கள் தனி கவனம் பெற்றிருக்கின்றன.

வித்தியாசமான உருவாக்கம், கலைத்தன்மை கொண்ட காட்சிகள் என இவரது படங்களுக்கு பல்வேறு தனித்துவம் உண்டு.

1996-இல் ‘குரோக்கோடைல்’ திரைப்படத்தில் தொடங்கிய இவரது திரைப்பயணம், 2015-இல் வெளியான ‘ஸ்டாப்’ வரை ஏராளமான அதிசயங்களை நிகழ்த்திருக்கிறது.
கிம் கி டக் இயக்கிய ‘3-அயன்’, ‘பயட்டா’ ஆகிய படங்கள் வெனிஸ் திரைப்பட விழாவில் விருதுகளை வென்றிருக்கின்றன.

‘அரிராங்’ ஆவணப்படத்திற்கு கான் திரைப்பட விழா விருது கிடைத்திருக்கிறது. திரைப்பட விழாக்களில் தன்னை அணுகும் ரசிகர்களிடம் கனிவுடன் உரையாடும் இயல்புடையவர் கிம் கி டக்.

லாட்வியாவில் வசித்துவந்த கிம் கி டக் கொரோனாவால் பாதிக்கப்பட்டிருந்ததாகவும், அதனால் ஏற்பட்ட உடல் உபாதைகளால் இன்று நள்ளிரவு காலமானதாகவும் லாட்வியா ஊடகங்கள் செய்தி வெளியிட்டிருக்கின்றன.
அவரது மறைவை அறிந்து ஏராளமான திரை ஆளுமைகள் இரங்கல் தெரிவித்து வருகிறார்கள்.