இலங்கை விஞ்ஞானி தலைமையில் புதிய கண்டுபிடிப்பு..!!

அமெரிக்காவின் Southern Illinois University Carbondale பல்கலைக்கழகத்தில் நுண்ணுயிரியலாளராக பணியாற்றும் இலங்கையைச் சேர்ந்த கலாநிதி லஹிரு ஜயகொடி தலைமையிலான விஞ்ஞானிகள் குழு, பிளாஸ்டிக் கழிவுகள் மற்றும் பயன்படுத்தப்பட்ட தாவரப் பொருட்களைப் பயன்படுத்தி புரதம் நிறைந்த, உண்ணக்கூடிய 3D அச்சிடப்பட்ட குக்கீகளை தயாரிக்கும் புதிய தொழில்நுட்பத்தை உருவாக்கியுள்ளார்.

நாசா நிறுவனத்தின் அனுசரணையுடன் முன்னெடுக்கப்படும் இந்த ஆய்வில், குடிநீர் மற்றும் குளிர்பான போத்தல்கள் தயாரிக்கப் பயன்படுத்தப்படும் PET பிளாஸ்டிக், பயன்படுத்தப்பட்ட சோளத் தாவரப் பகுதிகள் உள்ளிட்ட உயிரியல் கழிவுகள் மூலப்பொருட்களாகப் பயன்படுத்தப்படுகின்றன.

முதலில் பிளாஸ்டிக் மற்றும் தாவரக் கழிவுகள் அதிக வெப்பநிலை மற்றும் அழுத்தத்தின் கீழ் நீர் மற்றும் ஒட்சிசனுடன் இணைக்கப்பட்டு, நுண்ணுயிரிகளால் செரிக்கக்கூடிய சிறிய மூலக்கூறுகளாக மாற்றப்படுகின்றன.

பின்னர் விசேடமாக உருவாக்கப்பட்ட பாக்டீரியா அல்லது ஈஸ்ட் வகைகள் சேர்க்கப்பட்டு, இந்தக் கலவைகள் புரதம், கொழுப்பு மற்றும் அத்தியாவசிய சர்க்கரைகள் கொண்ட ஊட்டச்சத்து நிறைந்த உயிர்ப்பொருளாக மாற்றப்படுகின்றன.