ஏ.ஆர். ரஹ்மானின் கருத்துக்கு இந்தியாவில் கடும் எதிர்ப்பு

நேர்காணலில் பேசிய ஏ.ஆர். ரஹ்மான், “படைப்பாற்றல் இல்லாத சில நபர்கள் இப்போது முடிவெடுக்கும் அதிகாரத்தில் உள்ளனர். எனக்குக் கிடைக்க வேண்டிய வாய்ப்புகள் ‘சீன கிசுகிசு’ (Chinese whispers) போல கைநழுவி வேறு ஐந்து இசையமைப்பாளர்களுக்கு வழங்கப்படுகின்றன. இது மத ரீதியான காரணமாகவும் இருக்கலாம், ஆனால் அது நேரடியாக என் முகத்திற்கு முன்னால் சொல்லப்படுவதில்லை” என்று குறிப்பிட்டார்.

ரஹ்மானின் இந்தக் கருத்துக்கு வலதுசாரி அமைப்புகளிடமிருந்து கடும் விமர்சனங்கள் எழுந்துள்ளன.

வலதுசாரி விமர்சகர்கள் ரஹ்மானின் தேசபக்தி மற்றும் திறமையை கேள்விக்குட்படுத்தி, அவர் “பாதிக்கப்பட்டவர்” (Victim card) போல நடிக்கிறார் என விமர்சித்துள்ளனர்.

விமர்சனங்கள் தீவிரமடைந்த நிலையில், ஏ.ஆர். ரஹ்மான் தனது இன்ஸ்டாகிராம் பக்கத்தில் விளக்க வீடியோ ஒன்றை வெளியிட்டுள்ளார். அதில், தனது நோக்கம் எப்போதும் இசை மூலம் மக்களை உயர்த்துவதும், கௌரவிப்பதுமே தவிர யாரையும் காயப்படுத்துவது அல்ல என்று தெரிவித்துள்ளார்.

தற்போது பொலிவூட் படங்களில் முஸ்லிம் கதாபாத்திரங்கள் பெரும்பாலும் எதிர்மறையாக அல்லது வன்முறையாளர்களாகச் சித்தரிக்கப்படுவதாகத் திரை விமர்சகர்கள் கவலை தெரிவித்துள்ளனர்.

சென்னையைச் சேர்ந்த ஏ.ஆர். ரஹ்மான், தனது திரையுலகப் பயணத்தைத் தமிழ் சினிமாவிலேயே ஆரம்பித்தார் என்பது குறிப்பிடத்தக்கது.