கனடா விரைவில் அமெரிக்காவின் 51ஆவது மாநிலமாக மாறிவிடும்

கனடா நாடு நீண்ட காலமாக அமெரிக்காவிற்குப் பல்வேறு வகைகளில் தொல்லை தந்து வருவதாகவும், இறுதியில் அது அமெரிக்காவின் 51ஆவது மாநிலமாக மாறிவிடும் என்றும் அமெரிக்க அதிபர் டொனால்ட் டிரம்ப் தெரிவித்துள்ளார்.

அரிசோனா மாநிலம் புல்ஹெட் நகரில் நடைபெற்ற தேர்தல் பிரச்சாரக் கூட்டத்தில் பேசியபோது அவர் இதனைக் குறிப்பிட்டார்.

கனடா அமெரிக்காவை மிகவும் மோசமாக நடத்துவதாகவும், பால் பொருட்கள் மீது அதிகப்படியான வரிகளை விதித்து அமெரிக்காவை ஏமாற்றுவதாகவும் அவர் குற்றம்சாட்டினார்.

மேலும், அமெரிக்க கார் நிறுவனங்கள் தங்கள் தொழிற்சாலைகளை அமெரிக்காவிற்கே மாற்றுவது குறித்தும் அவர் பேசினார்.

“கனடா இறுதியில் நமது நாட்டின் 51ஆவது மாநிலமாக மாறிவிடும், ஏனென்றால் அதுதான் ஒரே வழி. நமக்கு அவர்கள் தேவையில்லை, ஆனால் அவர்களுக்கு நாம் தேவை” என்று டிரம்ப் கடுமையாக விமர்சித்தார்.

கிரீன்லாந்து விவகாரத்தைப் போல கனடாவும் அமெரிக்காவுடன் இணைவது குறித்துச் சிந்திக்கும் காலம் வரும் என்று அவர் குறிப்பிட்டார்.

இதனிடையே, அமெரிக்க இடைக்காலத் தேர்தல் நெருங்கும் வேளையில், கனடா நாட்டு அரசியல்வாதிகளின் சில நடவடிக்கைகள் அமெரிக்கத் தேர்தல்களில் “அரசியல் தலையீடாக” அமையக்கூடும் என கனடாவுக்கான அமெரிக்கத் தூதர் பீட் ஹோக்ஸ்ட்ரா கருத்து தெரிவித்துள்ளார்.

கனடா அமைச்சர்களின் சில வர்த்தக மற்றும் வரி விதிப்பு நடவடிக்கைகள் அமெரிக்க வாக்காளர்களைப் பாதிக்கும் வகையில் உள்ளதாக அவர் குற்றம்சாட்டியுள்ளார்.