அரபு கட்சிகளுடன் இணைந்து ஆட்சியமைக்கப் போவதில்லை: நெதன்யாகு திட்டவட்டம்

No Question Of Arab Parties-Backed Government: அரபு கட்சிகளின் ஆதரவு கொண்ட அரசாங்கத்திற்கு வாய்ப்பே இல்லை.

வாக்கெடுப்புக்குப் பிறகு நாட்டு மக்களிடம் முதன்முதலாக உரையாற்றிய இஸ்ரேலியப் பிரதமர் பெஞ்சமின் நெதன்யாகு, வாக்குப்பதிவுக்குப் பிந்தைய கருத்துக்கணிப்புகளின்படி, அடுத்த நாடாளுமன்றத்தில் தங்களது லிகுட் (Likud) கட்சி மிகப்பெரிய கட்சியாக உருவெடுக்கும் என்று தெரிவித்துள்ளார்.

கடந்த மூன்றாண்டுகளில் இஸ்ரேல் அடைந்த ராணுவ சாதனைகளைப் பட்டியலிட்ட நெதன்யாகு, அமெரிக்க ஜனாதிபதி டொனால்ட் ட்ரம்புடன் தனக்குள்ள நெருக்கமான உறவை வலியுறுத்தியதுடன், ஈரானின் ஆட்சிக்கு எதிரான பணியை முழுமையாக முடித்துக்காட்டப்போவதாகவும் உறுதியளித்தார்.

இந்த நிலையில், தற்போது வாக்கு எண்ணிக்கை சுமார் 73 சதவீதம் முடிவடைந்ததை அடுத்து, வெளியாகியுள்ள தகவலின் அடிப்படையில், நெதன்யாகு கூட்டணி 54 ஆசனங்களையும், பிரதான எதிர்க்கட்சிகள் கூட்டணி 48 ஆசனங்களையும், அரபு கட்சிகள் 18 ஆசனங்களையும் கைப்பற்றியுள்ளன.

ஆட்சி அமைக்க 61 ஆசனங்கள் தேவை என்ற நிலையில், இன்னும் கிட்டத்தட்ட 27 சதவீத வாக்குகள் எண்ணப்பட உள்ளது. இந்த நிலையில், கடும் போட்டிக்குப் பிறகு புதிய அரசாங்கத்தை தங்களது கூட்டணி அமைக்க இருப்பதாகவும் நெதன்யாகு உறுதியளித்தார்.

தேர்தலுக்குப் பிந்தைய கருத்துக் கணிப்புகள், நெதன்யாகுவின் அணியும் அவரது எதிர்ப்பாளர்களும் சமநிலையில் இருப்பதாகவும், இரு தரப்பினராலும் ஆளும் கூட்டணிகளை அமைக்க இயலவில்லை என்றும் காட்டியதால், அரபு தலைமையிலான கட்சிகள் ஆட்சியை நிர்ணயிக்கும் சக்திகளாக மாறக்கூடும்.

யூத மற்றும் சியோனிச பெரும்பான்மையினர் ஒன்றிணைய வேண்டும் என்று அழைப்பு விடுத்துள்ள நெதன்யாகு, அரபு கட்சிகளின் ஆதரவு கொண்ட ஓர் அரசாங்கம் அமைவது என்பது முற்றிலும் ஏற்றுக்கொள்ள முடியாத ஒன்று எனவும் அவர் அழுத்தமாகப் பதிவு செய்துள்ளார்.

வாக்கு எண்ணிக்கை தொடர்ந்து நடைபெற்று வருவதால் முடிவுகளில் இன்னும் மாற்றம் ஏற்பட வாய்ப்புள்ளது; இருப்பினும், ஐசென்கோட் வெற்றி பெறுவதற்கான வாய்ப்பு மிகவும் குறைந்துவிட்டது என்றே கூறுகின்றனர்.

நெதன்யாகுவை எதிர்க்கும் கட்சிகளின் கூட்டணியை (மைய-இடது முதல் தீவிர-வலது வரை) வழிநடத்தும் ஐசென்கோட், தேர்தலுக்கு முந்தைய கருத்துக்கணிப்புகள் கணித்திருந்த கடும் போட்டியை வெளிப்படுத்தத் தவறிவிட்டார்.

எதிர்பார்த்தபடியே, 120 ஆசனங்களைக் கொண்ட இஸ்ரேலிய நாடாளுமன்றத்தில் நெதன்யாகு தனது அணியின் பெரும்பான்மையை இழந்துள்ளார்.

அதே சமயம், அரபு கட்சிகளின் ஆதரவு இல்லாமல் அவரைப் பதவியிலிருந்து அகற்றுவதற்கான வாய்ப்பு எதையும் அவரது எதிர்ப்பாளர்கள் கொண்டிருக்கவில்லை; ஆனால், அத்தகைய ஆதரவைப் பெறுவதை பலரும் முற்றிலுமாக நிராகரித்துவிட்டனர்.

அப்போதும் கூட, எந்தவொரு கூட்டணிப் பேச்சுவார்த்தையின் போதும், அல்லது அடுத்த ஆண்டு புதிய தேர்தல் நடைபெறும் வரையிலும் நெதன்யாகு தற்காலிகப் பொறுப்பாளராக நீடிப்பார் என்றே தெரிய வருகிறது.