சுவிஸில் இருந்து இலங்கைக்கு நேரடி விமான சேவைகள் ஆரம்பம்!

சுவிஸ் விமான நிறுவனமான ‘எடெல்வைஸ் ஏர்’ (Edelweiss Air), இலங்கைக்கான தனது குளிர்கால விமான சேவைகளை மீண்டும் தொடங்கியுள்ளது. இதன் மூலம் சுவிட்சர்லாந்தும் இலங்கையும் வாரத்திற்கு மூன்று விமான சேவைகள் வாயிலாக மீண்டும் இணைக்கப்பட்டுள்ளன.

கட்டுநாயக்க, பண்டாரநாயக்க சர்வதேச விமான நிலையத்தின் (BIA) தகவல்படி, குளிர்கால பருவத்திற்காக அந்த விமான நிறுவனம் தனது சேவைகளை மீண்டும் தொடங்கியுள்ளது.

இது இரு நாடுகளுக்கும் இடையே பயணிகளுக்கு நேரடி விமான இணைப்பை வழங்குகிறது. அந்த விமான நிறுவனத்தின் விமானத்தில் வந்த பயணிகள், இலங்கை சுற்றுலா மேம்பாட்டு பணியகத்தால் ஏற்பாடு செய்யப்பட்ட பாரம்பரிய கண்டி நடன நிகழ்ச்சியின் மூலம் வரவேற்கப்பட்டனர்.

இலங்கைக்கு வருகை தரும் பயணிகளுக்கு அன்பான வரவேற்பை அளிக்கும் நோக்கில், இந்த கலாச்சார நிகழ்ச்சி ஏற்பாடு செய்யப்பட்டதாக விமான நிலைய நிர்வாகம் தெரிவித்துள்ளது.

எடெல்வைஸ் ஏர் (Edelweiss Air) நிறுவனத்தின் குளிர்கால விமானச் சேவைகள் மீண்டும் தொடங்கப்படுவது, இலங்கையின் சுற்றுலாப் பருவத்தின் உச்சக்கட்ட காலத்தில் சுவிட்சர்லாந்திலிருந்து சுற்றுலாப் பயணிகள் வருகை தருவதற்கு ஊக்கமளிக்கும் என்று எதிர்பார்க்கப்படுகிறது.