டுபாயில் விரைவில் திறக்கப்படவுள்ள 24 கரட் தங்கத்திலான நடைபாதை

டுபாயில் 24 கரட் தங்கத்தில் உருவான நடைபாதை விரைவில் திறக்கப்பட உள்ளது.

ஐக்கிய அரபு எமிரேட்சின் டுபாய், உலகின் வணிக மற்றும் சுற்றுலா தலைநகராக விளங்குகிறது. குறிப்பாக தங்க நகைகளின் கூடாரமாக திகழ்கிறது.

அங்கு தங்கம் மற்றும் நகைகள் வாங்குவதற்கு வரி கிடையாது. வெளிநாடுகளிலிருந்து இறக்குமதி செய்யப்படும் தங்கத்திற்கு கடுமையான வரிகள் இல்லாததால், உலகின் பல நாடுகளை விட டுபாயில் தங்கம் மிக குறைந்த விலையில் கிடைக்கிறது.

இதனால் சுற்றுலா பயணிகள் மற்றும் முதலீட்டாளர்கள் தங்கம் வாங்குவதற்கு டுபாயை தேடி செல்கின்றனர். இதற்காக டுபாயின் தெய்ரா பகுதியில் தங்க விற்பனை மாவட்டம், இந்தாண்டு ஜனவரியில் தொடங்கப்பட்டது.

விரைவில் இந்த தங்க நகர அந்தஸ்தை மேலும் மெருகூட்டும் வகையிலும், சுற்றுலா பயணிகளை கவரும் நோக்கிலும் தங்க மாவட்டம் பிரமாண்டமான சாதனையை படைக்க தயாராகி வருகிறது. அதாவது அங்கு உலகின் மிக நீளமான, 24 கரட் தங்கத்திலான நடைபாதை விரைவில் திறக்கப்படவுள்ளது.

அடுத்த இரண்டு மாதங்களுக்குள், இந்த நடைபாதை திறக்கப்பட உள்ளது. உலக அளவில் தங்கத்தின் விலை ஒரு பவுன் ரூ.1 லட்சத்திற்கும் மேல் விற்பனையாகி வருகிறது.