38 வயது ஆசிப் அப்ரிடி பாக். அணிக்கு…!!!
தென்னாபிரிக்காவுக்கு எதிராக ராவல்பிண்டியில் நேற்று ஆரம்பமான இரண்டாவது டெஸ்ட் போட்டியில் பாகிஸ்தான் அணி சார்பில் 38 வயதாகும் இடது கை சுழல் வீரர் ஆசிப் அப்ரிடி தனது கன்னி டெஸ்ட் போட்டியில் ஆட அழைக்கப்பட்டுள்ளார்.
பெஷாவரைச் சேர்ந்த அப்ரிடி 2009 ஆம் ஆண்டு தனது கன்னி முதல்தர போட்டியில் அறிமுகம் பெற்று இதுவரை 57 முதல் தரப் போட்டிகளில் ஆடிய நிலையிலேயே பாகிஸ்தான் அணிக்கு அறிமுகமாகியுள்ளார். எனினும் அவர் ஊழல் தடுப்பு விதியை மீறியதற்காக 2023 இல் பாக். கிரிக்கெட் சபையால் இரண்டு ஆண்டுகள் தடைக்கு உள்ளானமை குறிப்பிடத்தக்கது.
இந்நிலையில் நேற்று அப்ரிடி தனது 38 வயது 299 நாட்களிலேயே கன்னி டெஸ்டில் களமிறங்கினார். இதன்மூலம் பாக். அணிக்காக கன்னி டெஸ்டில் ஆடும் மூன்றாவது வயதான வீரராக பதிவானார். 1955 இல் லாகூரில் நடந்த இந்தியாவுக்கு எதிரான போட்டியில் மிரான் பக்தர் 47 வயது 284 நாட்களில் பாகிஸ்தான் அணிக்கு கன்னி டெஸ்டில் ஆடியது இந்த வரிசையில் முதல் இடத்தில் உள்ளது.
இதில் இரண்டாவது இடத்தில் இருக்கும் அமிர் இலாஹி 1952 இல் தனது 44 ஆவது வயதில் பாகிஸ்தான் அணிக்கான தனது கன்னி டெஸ்டில் ஆடியபோதும் அவர் அதற்கு முன்னர் இந்திய அணிக்காக டெஸ்ட் போட்டியில் ஆடியுள்ளார்.
டெஸ்ட் கிரிக்கெட் வரலாற்றில் கன்னி டெஸ்டில் ஆடிய மிக வயதான வீரராக இங்கிலாந்தின் ஜேம்ஸ் சௌதர்டன் உள்ளார். 1877 இல் மெல்பேர்னில் நடந்த அவுஸ்திரேலியாவுக்கு எதிரான போட்டியில் அவர் அறிமுகம் பெற்றபோது அவரது வயது 49 ஆண்டுகள் 119 நாட்களாகும்.
You must be logged in to post a comment.